Сохта заргар қўлга тушди

ЯҚИНДА жиноят ишлари бўйича Яш­нобод туман судининг очиқ суд мажлисида Ибодулла Насимовнинг (исм-шарифлар ўзгартирилган) жиноят иши кўриб чиқилди. Судланувчининг маълумоти ўрта, оилали, тўрт нафар вояга етмаган фарзанди бор.

Муқаддам фирибгарлиги учун бир неча марта судланган. Ўрганган кўн­гил ўртанса қўймас, деганларидек у ўзганинг мулкини алдаш ва ишончни суиистеъмол қилиш йўли билан қўлга киритиш мақсадида Зилола Саидовага ўзини заргар деб таништиради.

— Тилла зирагингизни ўзим яхши­лаб таъмирлаб бераман. Хизмат ҳа­қимга 90.000 сўм берсангиз бўлади.

Бироқ тилла зиракни ҳамда пулни қўлга киритган бу шаввоз ваъдасида турмади. Тақинчоқни сотиб, пулини ўз эҳтиёжига ишлатиб юборди. Бундан ташқари, у Гулсара Носировани ҳам алдаб, унга ўзини заргар, деб таништириб, унинг умумий баҳоси 1.000.000 сўмлик зирагини ҳамда 500.000 сўмлик тилла буюмини қўлга киритади. Фирибгар хизмат ҳақи, дея ундан 30.000 сўм ҳам олади. Назира Қаюмова ҳам унинг “ўлжасига”га айланганлардан бири. И.Насимов бу аёлни ҳам алдайди. Унга 200.000 сўмлик зарар етказади.

Суд мажлисида судланувчи та­ри­қасида сўроқ қилинган И.Насимов айбини тан олиб, кечиришларини сўради. Алдаш ва ишочни суиистеъмол қилиш йўли билан ўзгаларнинг мулкини қўлга киритган фирибгар қонун олдида жавоб берди. У судда жабрланувчилардан ҳам кечирим сўради. Бироқ фирибгарликни одат қилган бу инсон хулоса чиқарармикан?

Шу ўринда баъзи муло­ҳаза­лари­мизни айтиб ўтсак. Аввало, ҳар би­римиз ҳушёр ва эътиборлироқ бўл­сак, фирибгарлар алдовига учмаймиз. Қолаверса, мол-мулкимизни ўзга­нинг қўлига бериб, чув тушиб қол­май­­миз. Шу каби жиноятларнинг олди­ни олиш, фуқароларимизнинг фи­риб­гарлик оқибатида жабр кўриб қол­мас­ликлари учун туман суди томонидан маҳаллаларда, корхона, муассаса ва ташкилотларда учрашувлар ташкил этилмоқда. Бу тадбирларда асосий эъти­бор фуқароларимизнинг ҳуқуқий онги ва ҳуқуқий маданиятини оширишга қаратилмоқда.

Мавлон ҒАФУРОВ,

Жиноят ишлари бўйича Яшнобод туман суди судьяси