-A A +A

Сайтимизнинг оҳирги янгиликларидан ҳабардор бўл!

Хорижга чиқиш учун қандай паспорт керак? (2019 йил, 3 сон)

31.01.2019

Биласизми?

Президентимизнинг 2017 йил 16 августда қабул қилинган "Ўзбекистон Республикаси фуқароларининг хориж­га чиқиш тартибини такомиллаштиришга доир муҳим чора-тадбирлар тўғрисида"ги Фармонига кўра, 2019 йилнинг 1 январидан хорижга чиқиш учун рухсат ёзуви стикерини расмийлаштириш тартиби бекор қилинди. Шу санадан бошлаб Ўзбекистон фуқаросининг хорижга чи?иш биометрик паспорти (хорижий паспорт) жорий этилди.

Бунда 2021 йилнинг 1 январига қадар кириш визаларини расмийлаштириш талаб этилмайдиган давлатлар ҳудудига амалда қўлланилаётган 2011 йилги намунадаги биометрик паспортдан фойдаланган ҳолда чиқишга рухсат этилади.

Амалдаги биометрик паспорт ўз кучида қолади. Фақат чет элга чиқмоқчи бўлган фуқароларга янги жорий этилган фуқаролик паспорти берилади. Унинг афзаллиги ўзида ­электрон маълумотларни сақлайди ва бошқа ортиқча ҳужжатларни талаб қилмайди. Чет элга чиқиб кетаётганда иккала паспорт ҳам шахснинг ўзида сақланади. Хорижда ўқиш, иш юзасидан юрган юртдошларимизнинг паспортларидаги стикернинг муддати ўтган бўлса, улар Ўзбекис­тонга келиб, хорижга чиқиш паспортини расмийлаштиришлари мумкин.

Виза талаб қилинадиган мамлакатларга чиқиб кетиш учун айни чоғда фуқаронинг паспортида рухсат ёзуви қайд этилган икки йиллик стикерининг муддати ўтмаган бўлса, у ­ана шу муддат якунига қадар хорижга чиқиш ҳуқуқига эга.

Хорижга чиқиш учун биометрик паспорт фуқароларга, туғилган кунидан бошлаб бир ёшгача — икки йил муддатга, бир ёшдан 16 ёшгача — 5 йил муддатга, 16 ёшдан ошган шахс­ларга — 10 йил муддатга расмийлаштирилади.

Хорижга чиқиш учун биометрик паспорт йўқолганда, хорижга чиқиш учун биометрик паспорт ашёвий далил сифатида олиб қўйилган ҳолатларда расмийлаштириб берилади.

Хорижга чиқиш учун биометрик паспортни расмийлаштириш чоғида фуқаролар томонидан ҳудудий миграция ва фуқароликни расмийлаштириш хизмати маълумотларни йиғиш пунктига қуйидаги ҳужжатлар тақдим этилади:

– белгиланган шаклдаги ариза-анкета;

– биометрик паспорт ёки 16 ёшга тўлмаган фуқаролар учун туғилганлик тўғрисидаги гувоҳнома;

– илгари берилган хорижга чиқиш учун биометрик паспорт (бўлган тақдирда);

– ваколатли органнинг қарори (хориж­га чиқиш учун биометрик паспорт ашёвий далил сифатида олиб қўйилганида);

– ҳарбий гувоҳноманинг ёки бириктириш гувоҳномасининг кўчирма нусхаси ­ёхуд мудофаа ишлари бўйича бўлимнинг маълумотномаси — ҳарбий хизматга мажбурлар учун;

– давлат божи тўланганлиги тўғрисидаги патта;

– фуқаронинг хорижга чиқишига ­ота-оналар, васийларнинг нотариал тасдиқланган розилиги — вояга етмаганлар учун;

– фуқарога ҳамроҳлик қилувчи шахснинг нотариал тасдиқланган мажбурияти — вояга етмаганлар ­учун.

15 ёшдан 18 ёшгача бўлган фуқаролар ота-оналар, васийларнинг воя­га етмаган шахс мустақил равишда хорижга чиқишига нотариал тасдиқланган розилиги бўлган тақдирда хорижга кузатувчисиз чиқиши мумкин.

 

Алишер ҲОЖИЕВ,

Навоий вилоят ИИБ Миграция ва фуқароликни расмийлаштириш бошқармаси бошлиғи, подполковник